Categoría: Nuestra red

Quedó claro que nesta escuela somos mui, pero que
mui teatreros. Escolinos y escolines de cuartu y de sestu cursu de Llingua
Asturiana del CEIP San Félix, participaron nel VI Certame de Teatru Escolar en
Llingua Asturiana pa Educación Primaria, que con motivu de la cellebración de
la XL Selmana de les Lletres Asturianes, convocó la Conseyería d’Educación y
Cultura del Principáu d’Asturies.

Los neños y neñes de sestu presentaron al concursu
“El peñe d’oru”, una obra perprestosa en tres actos que xira al rodiu la
Mitoloxía Asturiana, tema central del Magüestu na escuela esti cursu. Esta
obra, con La Xana perguapa de protagonista, cunta tamién con otros personaxes
como El Trasgu, El Cuélebre, El Busgosu, El Diañu, La Güestia y L’Home’l sacu.

Per otru llau, escolinos y escolines de cuartu
cursu, presentaron “Los ciruxanos candasos corten pelo sano”, una comedia qu’al
traviés d’una escena cotidiana nun consultoriu médicu, fai una crítica social
puxando pola escuela y la sanidá pública, pola música y el teatru n’asturianu,
por xugar na cai colos collacios como se facía enantes… .Pero perriba de too glaya
porque se respete la Llingua Asturiana como se merez, como a les demás
llingües, y porque s’utilice la Llingua Asturiana en tolos contestos de la vida,
como ye nel casu de la obra, cuando vamos al médicu.

Con “Los ciruxanos candasos corten pelo sano”, los
escolinos y escolines de cuartu, llograron el “Segundu Premiu a la Meyor Obra”
y el “Primer Premiu al Meyor Guión Adautáu” nel VI Certame de Teatru Escolar en
Llingua Asturiana pa Educación Primaria de la Conseyería d’Educación y Cultura
d’Asturies. Premios que recoyeron nuna gala perprestosa que se cellebró nel
Teatru Palaciu Valdés d’Avilés.

Pa cellebrar too esto, per un llau el bon trabayu
que ficieron tanto los escolinos y ecolines de cuartu como los de sestu (los
premios nun mos importen, importen les ganes que se ponen pa facer les coses),
y per otru llau, la XL Selmana de les Lletres Asturianes, el CEIP San Félix en collaboración
col Teatru Prendes de Candás, organizó una Xornada de Teatru Escolar onde se
representaron les dos obres de teatru y unos cancios de “Xentiquina” y “Pop
Piquiñín”, pa que se notare qu’esta Selmana de les Lletres tuvo dedicada a la
música n’asturianu.

Darréu dexámosvos un enllaz pa que podáis ver les
obres de teatru y unes cuantes semeyes tanto de la gala de premios como de la
cellebración nel Teatru Prendes. 

¡Munches gracies a toos y a toes!

• 

• 

• 

•